શ્રીરામકૃષ્ણ દેવ એક અદ્ભુત ગુરુ હતા, જેમણે પોતાના શિષ્યોમાં આધ્યાત્મિક જ્યોત પ્રગટાવી તેમને ઈશ્વરપ્રેમમાં તરબોળ કર્યા હતા. તેમના સંન્યાસી શિષ્યો સાધારણ મનુષ્યો નહીં, પરંતુ ઉચ્ચ કોટિના મુક્ત આત્માઓ હતા. પ્રસ્તુત પુસ્તકમાં શ્રીરામકૃષ્ણ દેવના પરમ શિષ્ય સ્વામી સુબોધાનંદજી મહારાજના જીવનના વિવિધ પ્રસંગોનું સંકલન કરીને તેમનું સંક્ષિપ્ત જીવનચરિત્ર રજૂ કરવામાં આવ્યું છે.

આ પુસ્તકનો મુખ્ય સ્ત્રોત વેદાંત સોસાયટી, સેન્ટ લુઈસ દ્વારા પ્રકાશિત અને સ્વામી ચેતનાનંદજી દ્વારા લિખિત અંગ્રેજી પુસ્તક 'God Lived With Them' છે. આ ઉપરાંત, સ્વામી ગંભીરાનંદજી કૃત 'શ્રીરામકૃષ્ણ ભક્તમાલિકા'માંથી પણ કેટલાક અંશો લેવામાં આવ્યા છે. પ્રકાશકોએ આ કાર્ય માટે પરવાનગી આપનાર વેદાંત સોસાયટી અને ગુજરાતી અનુવાદ કરનાર શ્રી દુષ્યંતભાઈ પંડ્યાનો આભાર વ્યક્ત કર્યો છે.