શ્રી રામકૃષ્ણદેવના ગૃહસ્થ શિષ્ય અક્ષયકુમાર સેને બંગાળી ભાષામાં 'શ્રી શ્રીરામકૃષ્ણ પુંથિ' નામનો ગ્રંથ લખ્યો હતો, જેની પ્રશંસા સ્વામી વિવેકાનંદ અને શ્રી મા શારદાદેવીએ પણ કરી હતી. શ્રીરામકૃષ્ણ આશ્રમ, રાજકોટ દ્વારા આ બંગાળી ગ્રંથના છેલ્લા સંસ્કરણના આધારે 'શ્રીરામકૃષ્ણ પુરાણ' ભાગ-૧ અને ૨ ગુજરાતી ભાષામાં પ્રસિદ્ધ કરાયું છે. આ પહેલાં સ્વામી ચૈતન્યાનંદજીએ મૂળ બંગાળી આવૃત્તિના આધારે ૫૦૦૦ કાવ્યપંક્તિઓનો સમશ્લોકી અનુવાદ કર્યો હતો. પાછળથી વિદ્વાનો અને સ્વામીજીઓ દ્વારા મૂળ બંગાળી સંસ્કરણો સાથે પંક્તિવાર સરખામણી અને જરૂરી સુધારા કરીને આ સુંદર સંપાદન તૈયાર કરવામાં આવ્યું છે. આ ગ્રંથ શ્રીરામકૃષ્ણદેવના લીલાપ્રસંગો અને ભક્તિભાવને ભક્તો, સાધકો અને વાચકો સુધી પહોંચાડવામાં ખૂબ ઉપયોગી સાબિત થશે.