આ પુસ્તક શ્રીમદ્ ભગવદ્ ગીતાના 'કર્મયોગ'ના સિદ્ધાંતો પર આધારિત છે, પરંતુ તે માત્ર પરંપરાગત ભાષ્ય નથી. સ્વામી વિવેકાનંદે આધુનિક મનોવિજ્ઞાનના સંદર્ભમાં કર્મની ફિલોસોફીને એટલી સચોટ રીતે સમજાવી છે કે તે એક સ્વતંત્ર ગ્રંથ સમાન છે.

પુસ્તકના આઠ વ્યાખ્યાનોમાં જણાવાયું છે કે મનુષ્ય ગમે તેવી સામાજિક સ્થિતિમાં હોય, પણ જો તે અનાસક્ત (attachment વગર) થઈને પોતાનું કાર્ય કરે, તો તે મુક્તિ મેળવી શકે છે. અહીં સંપ્રદાયોથી પર રહીને વ્યાપક દૃષ્ટિકોણ રજૂ કરાયો છે.

કર્મયોગી કોણ બની શકે?

• ઈશ્વરચિંતન કરતો સંન્યાસી.

• પરિવારની સંભાળ રાખતી ગૃહિણી.

• પ્રયોગશાળામાં સંશોધન કરતો વૈજ્ઞાનિક.

• મજૂર, મિકેનિક, ડૉક્ટર, શિક્ષક, ખેડૂત કે સૈનિક.

ટૂંકમાં, દરેક વ્યક્તિ પોતાનું કર્તવ્ય નિષ્ઠાપૂર્વક બજાવીને 'પૂર્ણતા' પ્રાપ્ત કરી શકે છે. જીવનમાં કર્મની સાધના કરનાર દરેક વ્યક્તિ માટે આ પુસ્તક અત્યંત પ્રેરણાદાયી છે.